uyghur pochtisi, 23-féwral
amine sedef
21-féwral — dunya ana til küni. her yili bu künde herqaysi ana til mektepliri türlük pa’aliyetler arqiliq bu künni xatirileydu we ana tilning muhimliqini tekitleydu. bu yilmu uyghur akadémiyesi, serxillar ma’aripi we tang nuri ana til mektipi oxshimighan shekillerde, mol mezmunluq we rengdar pa’aliyetler bilen bu künni tebriklidi.
uyghur akadémiyesi we serxillar ma’aripi teripidin istanbul sabahiddin zayim uniwérsitétida ötküzülgen pa’aliyetke uyghur akadémiyesi, dunya uyghur qurultiyi wexpi, dunya uyghur yazghuchilar jem’iyiti, ma’arip hemkarliq jem’iyiti, ili meshrep wexpi we fédératsiye wexpi rehberliri, shundaqla nurghunlighan oqughuchilar we ata-anilar qatnashti.
pa’aliyet istanbul waqti sa’et 11:00 de bashlandi. istiqlal marshi bilen perde échilghan bu pa’aliyette, uyghur akadémiyesidin abdulhemit qaraxan we serxillar ma’aripigha wakaleten doktor turdi muhemmet échilish sözi qildi. ular nutqida ana tilni qoghdap qélishning milletning medeniyiti we kimlikini saqlap qélishtiki muhim roli hemde ehmiyiti heqqide toxtaldi.
pa’aliyet «ana tilda mukapatliq léksiye sözlesh» we «ana til söygüsi kitab oqush musabiqisi» dep ikki türge ayrilghan bolup, kitab oqush musabiqisi mahirlarning yash cheklimisi boyiche oqughan kitabliridin chiqirilghan so’allargha neq meydanda jawab bérish sheklide élip bérildi. léksiye sözlesh musabiqisi bolsa, yashlarning özi qiziqqan témilarda teyyarlighan léksiyelirini neq meydanda sözlep bérishi sheklide élip bérildi.
pa’aliyet axirida, bahalighuchilarning adil bahalishi bilen meryem nurluqning «aldash sen’iti» témisidiki léksiyesi birinchi derijige, sutuq köktughning «türkiyediki uyghur» namliq léksiyesi ikkinchi derijige, abdusalam arslanning «<kérek> dégen sözning hayatimizdiki tesiri» namliq léksiyesi üchünchi derijige ériship mukapatlandi.
kitab oqush musabiqisige jem’iy on neper mahir qatnashqan bolup, bulardin nezife birinchi derijige, nefise ikkinchi derijige, sefiye üchünchi derijige érishti. mahirlar derijisige asasen ayrim-ayrim halda 10 ming, 5 ming we 2500 türk lirasi bilen mukapatlandi. shundaqla qalghan yette mahirghimu righbetlendürüsh mukapati bérildi.
tang nuri telim-terbiye merkizimu dunya ana til küni munasiwiti bilen, 17-féwral zeytinburnu kazlicheshme medeniyet merkizide «qedirlensun ana til» témisida edebiyat-sen’et pa’aliyiti ötküzdi.
pa’aliyetke tangnuri telim-terbiye merkizining oqutquchi-oqughuchiliri, ata-anilar we istanbulda yashaydighan bir qisim uyghurlar qatnashti. pa’aliyette «nuzugum medeniyet we a’ile jem’iyiti» re’isi minewer öz’uyghur xanim we sherqiy türkistan ölimalar birliki tetqiqat bölümi mudiri ustaz yüsüp qarihajim ana tilni öginish we qoghdashning ehmiyiti heqqide ayrim-ayrim söz qildi.
arqidin tangnuri telim-terbiye merkizining oqughuchiliri aldin teyyarlap kelgen rengdar edebiyat-sen’et nomurlirini orundap berdi. weten-millet séghinishi we ana til söygüsi ipadilen’gen mol mezmunluq nomurlar pa’aliyetke kelgen her bir kishini hayajanlandurdi.
pa’aliyet axirida, tangnuri telim-terbiye merkizi oqutquchilirining körsetken pidakarliqliri we xizmetliri teqdirlendi hemde ulargha mukapat buyumi bérildi.
