uyghur agénitliqi üchün amine sedef teyyarlighan.mes’ul muheriri: alip uyghur
(uyghur pochtisida ruxset bilen élan qilindi)
bu yil 27-séntebir istanbul türk ochaqlirida ehmiyetlik edebiy we medeniyet pa’aliyiti ötküzüldi. bu pa’aliyet öz nöwitide uyghur köchmenlik hékayisini eslesh we uyghurlarning medeniyitini tonushturushtiki muhim bir purset boldi. istanbuldiki pa’aliyetchiler we türk akadémiklarning qatnishishi bilen ötken bu sorun’gha, qazaqistan jumhuriyiti uyghur medeniyet merkizidin bir hey’etmu kélip, qazaqistandiki uyghurlarning tebriklirini yetküzdi.
* mukapat we tebrik: qazaqistan uyghur medeniyet merkizidin kelgen hey’et, hayatini uyghur dewasigha atighan, sha’ir we yazghuchi nur’ela köktürk xanimning «tengri taghliridin erjinisning baghrigha, köchüsh hékayisi» namliq kitabigha bérilgen mukapatni we qazaqistandiki uyghur qérindashlarning qizghin tebriklirini élip keldi.
* échilish sözi: türk ochaqliri istanbul shöbisining bashliqi doktor jezmi bayram (Dr. Cezmi Bayram) pa’aliyetke échilish sözi qildi.
* nur’ela köktürkning sözi: nur’ela köktürk xanim özining edebiy ijadiyet hayatini, shundaqla 1960- yillarning bashlirida istanbulgha köchüp kelgen bir gurup uyghurlarning weten hesritige tolghan köchmenlik hékayisi we sergüzeshtilirini tepsiliy sözlep berdi.
* qazaqistandiki uyghurlarning ehwali: qazaqistan uyghur medeniyet merkizining ayallar xizmitige mes’ul senem xanim we merkezdiki bashqa hey’et ezaliri ayrim-ayrim söz qilip, qazaqistandiki uyghurlarning hazirqi ehwali heqqide melumat berdi.
* sen’et nomuri: uyghurlarning dosti, türk dunyasining tonulghan xelq sen’etkari bunyamin aqsungghur (Bünyamin Aksungur) ependi dutar we rawap bilen uyghur naxshilirini orunlap, pa’aliyetke qatnashquchilarni uzaq tengri taghlirigha bashlap ketkendek hés qildurdi.
* minnetdarliq bildürüsh: pa’aliyet axirida, qazaqistan uyghur medeniyet merkizidin kelgen méhmanlar nur’ela köktürk xanimgha doppa we ton kiydürüp, uning uyghurlar üchün qilghan uzun yilliq xizmetlirige chongqur minnetdarliq bildürdi.
nur’ela köktürkning qisqiche terjimihali we edebiy emgiki
nur’ela köktürk 1957- yili sherqiy türkistanning yeken nahiyeside dunyagha kelgen. u 1961- yili a’ilisi bilen bille afghanistan’gha köchüp, 1965- yili türkiyege kelgen we shuningdin béri türkiyede yashap kéliwatidu.
* uzun yilliq pa’aliyet: u kichik yéshidin bashlapla qeyseriyediki sherqiy türkistan muhajirlar jem’iyitide aktip xizmet qilip kelgen bolup, bu xizmetni bügünki kün’giche dawamlashturmaqta.
* eserliri (türk tilida): yazghuchi nur’ela köktürk yash waqtidin bashlap shé’ir oqush we yézishqa bashlighan. uning türk tilida yézilghan we türkiye hem qoshna türkiy jumhuriyetliride neshir qilinip tarqalghan eserliri töwendikiche:
* kök bayraq sewdasi (shé’ir 1-toplam)
* kök bayraq sewdasi(2- toplam)
* sherqiy türkistanning en’eniwi ashxana medeniyiti: uyghur ta’amliri
* sherqiy türkistan qizimen (shé’ir toplam)
* kök bayraqning köz yéshi (shé’ir toplam)
* tengri taghliridin erjinisning éteklirige köchüsh (roman)
bu eserler türkiye we türkiy tilliq xelqlerge musapir uyghurlarning héssiyati, ichki dunyasi, köchmenlik sergüzeshtiliri we medeniyitini chongqur tonushturup kelmekte.
* terjime emgekliri: nur’ela köktürk yene muhim edebiy terjiman bolup, yazghuchi söyün’gül xanimning «köz yéshida nemlen’gen zémin» we yazghuchi exmet igemberdining «hijran derdi» qatarliq kitablirini türkchige terjime qilghan. bu terjime kitablarmu türkiyede neshir qilinip, keng kölemde tarqalghan.
biz bu mol hosulluq yazghuchi, sha’ir we edebiy terjiman nur’ela köktürk xanimning ténige salametlik, kéyinki edebiy ijadiyet hayatigha téximu zor beriket tileymiz.
